विराटनगर । विराटनगरस्थित हिमालय रोडमा वुधवार साँझ सुरु भएको विराट सडक महोत्समा सयौंको संख्यामा खानाका पारखीहरुको भीड लागेको थियो । स्थानीय संस्कृति र जातीय खानाको प्रवद्र्धन गर्ने उद्देश्यसाथ महोत्सव शुरु गरिएको हो ।
विराटनगर महानगरपालिकाका प्रमुख भीम पराजुलीले एक औपचारिक कार्यक्रमबीच महोत्सव उद्घाटन गर्नु भएको थियो । महानगरपालिकाको मुख्य प्रवद्र्धनमा आयोजित महोत्सव मञ्जिना मुभिज क्रिएसनले आयोजना गरेको हो । उद्घाटन समारोहमा महानगर प्रमुख पराजुलीले खाना र संस्कृति पनि पर्यटन पवद्र्धनको प्रमुख आधार भएको भन्दै भ्रमण बर्ष सफल बनाउन यस्ता कार्यक्रम सहयोगी हुने वताउनु भयो ।
महोत्सवमा नेवारी, थारु, मारवाडी, थकालीसहित स्थानीय विभिन्न जातिका खानाका परिकारहरू मुख्य आकर्षण रहेका छन् । फुड ट्रक थप आकर्षणका रुपमा प्रस्तुत गरिने आयोजकको भनाइ छ ।
महोत्सवमा ५० वटा स्टल छन् खानाबाहेक स्थानीय उत्पादन, व्यावसायिक स्टल पनि राखिएको छ । आयोजक समितिका प्रबन्ध निर्देशक जतिन ताम्राकारले महोत्सवले पर्यटन बर्षलाई सहयोग पुग्ने बताउनु भयो । उद्घाटन समारोहमा बोल्दै मोरङ व्यापार संघका अध्यक्ष प्रकाश मुन्दडाले स्थानीय व्यापार प्रवद्र्धनका लागि पनि महोत्सव सफल हुने विश्वास व्यक्त गर्नु भयो । पर्यटन यात्रा डटकमका अध्यक्ष एवंम पर्यटन व्यवसायी भविषकुमार श्रेष्ठले महोत्सव निक्कै आकर्षक रुपमा प्रस्तुत हुने र सराहनीय भएको बताउनु भयो । कार्यक्रममा बोल्दै जिल्ला प्रहरी कार्यालय मोरङका एसपी विश्व अधिकारीले खाना र नाचगानलाई साथै प्रस्तुत गरिनु सकारात्मक भएको बताउनु भयो ।
महोत्सवमा हरेक साँझ स्थानीय तथा राष्ट्रियस्तरका कलाकारहरूको प्रस्तुति रहने छ । सीमावर्ती भारतीय बजार जोगबनी, फारविसगञ्ज, सुनसरी, मोरङ, झापालगायतका १ लाखभन्दा बढी दर्शकले महोत्सवको अवलोकन गर्ने कार्यक्रम सहसंयोजक सन्तोष महत (स्यान्ट्रो)ले बताउनु भयो । तीन दिनसम्म सञ्चालन हुने महोत्सव हरेक दिन ३ देखि राती ८ बजेसम्म सञ्चालन हुनेछ ।
