धनकुटा । धनकुटा जिल्लाको उत्तर–पूर्वमा रहेको जितपुर बजारमा रुद्राक्षको दानाको स्तम्भ बनाइएको छ । महालक्ष्मी नगरपालिका–७ मा रहेको जितपुर बजारमा करिब ८ लाखको लागतमा ६ मुखे चिल्लो थेप्चे आकारको रुद्राक्षको दानाको स्तम्भ बनाइएको हो । यसक्षेत्रका तत्कालीन ६ वटा गाविसहरू मिलेर पछिल्ल्लोपटक महालक्ष्मी नगरपालिका बनेको हो ।
जितपुर बजारमा बनाएको रुद्राक्षको दाना पनि ६ मुखे नै रहेको छ । अर्खौले–जित्पुर, मूर्तिडुंगा, लेगुवा, चानुवा, डाँडागाउँ र मारेकट्हरे गाविसहरूलाई मिलाएर महालक्ष्मी नगरपालिका बनाएको हो ।
‘धार्मिक महत्व वोकेको रुद्राक्ष पछिल्लो समय आयआर्जनको माध्यमसमेत बन्न पुगेको छ,’ महालक्ष्मीका मेयर पर्शुराम नेपालले भन्नुभयो, ‘यसलाई हामीले यहाँ पर्यटनसंँग पनि जोड्ने प्रयास गरेका हौं ।’ नगरपालिकाले यो स्तम्भ बनाएसँगै यहाँ पुग्ने जोकोही रुद्राक्षको दानामा सेल्फी खिच्न छुटाउँदैनन् । नगरपालिका क्षेत्रमा रुद्राक्षको व्यावसायिक खेतीलाई प्रोत्साहन गर्नसमेत स्तम्भ बनाएको मेयर नेपालले बताउनुभयो ।
महालक्ष्मी नगरपालिकाले यो स्तम्भसँगै नगर क्षेत्रमा रहेका अन्य पर्यटकीयस्थलहरूको समेत भौतिक विकासलाई प्राथमिकतामा राखेको छ । जितपुर बजारको शिरमा करिब डेढ करोडको लागतमा महालक्ष्मीको मन्दिर बनाइँदैछ भने वडानम्बर ७ र ६ को बीचमा रहेको गडीमा वनझाँक्री पार्कको निर्माण गरिने भएको छ । करिब साडे तीन करोडको लागतमा उक्त पार्क बन्न लागेको मेयर नेपालले बताउनुभयो । यसैगरी लाटीभञ्याङमा पोखरीसहित नागेश्वरको मूर्ति बन्ने भएको छ । महालक्ष्मीकै रामबजारमा रामको स्मारण बनाइने भएको छ । नगर क्षेत्रका पर्यटकीय स्थलहरूको नयाँ निर्माण, जीर्णोद्वार, मर्मतसम्हार जस्ता काम सकिएपछि महालक्ष्मी पर्यटकहरूको आकर्षक गन्तव्य बन्ने मेयर नेपालको बताउनुभयो ।
