सतासीधाम झापा जिल्लाको शिवसताक्षी नगरपालिकामा पर्ने एक महत्त्वपूर्ण धार्मिक तथा पर्यटकीय स्थल समेत हो। झिलझिले बजारबाट करिब ४ कि. मी. उत्तर चुरेपहाडको फेदीमा यो स्थान अवस्थित छ। इलामको सिमानासँग जोडिएको यस स्थानमा रहेका प्राकृतिक मूर्तिका स्वरुपहरु, भित्तामा रहेका गाईका थुन आकारका प्रतीकहरु, सतासी खोलाको एक स्थानको बीच भागमा करिब २० मिटरभित्र मात्र निस्कने गन्धक – पानी, फेदीमा रहेका अन्य मूर्तिहरूले पनि यो स्थान धार्मिक र प्राकृतिक दृष्टिले रोमाञ्चकारी रहेको छ ।
यहाँ जाने भक्तजनहरु आफ्नो मनोकांक्षा पूरा हुने विश्वासले पूजा आराधना गर्दछन् । सतासीधाममा प्रत्येक वर्ष बालाचतुर्दशीको दिन शतबीज छर्नको निम्ति दर्शनार्थीहरूको घुँइचों लाग्ने गर्दछ । विगत पाँच वर्षअघिसम्म बाटो, बिजुली बत्ती नपुगेको धाममा यतिबेला करोडौँको लगानीमा भौतिक पूर्वाधार तयार भएका छन् । धाम क्षेत्रभित्र आवास, संस्कृति विद्यालयको भवन र मठमन्दिरका ठूला ठूला भवनसमेत बनेका छन् । यसलाई पवित्र धार्मिकस्थल मानिन्छ। सतासीधाममा गौशाला पनि छ उक्त गौशालामा विभिन्न जातका गाई वस्तु राखिएको छ। गाईवस्तु भने इन्डियाहरूबाट पनि आउने गर्दछन् । दिउँसो गाईवस्तुलाई चराउन बाहिर चौरीतिर निकालिन्छ र साँझमा भने गौशालामै राखिन्छ।
यस गौशालाबाट गौमुत्र सङ्कलन गरी विभिन्न तरिकाका आयुर्वेदिक औषधिहरूको निर्माण हुने पनि बताइएको छ। सतासीधाममा वर्षैपिच्छे ठूलो ठूलो महायज्ञ महापुराण पनि लाग्ने गर्दछन्। यस स्थानमा विभिन्न देवीदेवताका मन्दिर गौशाला महाराजहरूलाई विश्राम गर्न विश्रामस्थल आभास सबैको सुविधा रहेको छ। सतासीधाम मन्दिर बाट करिब ३ किलोमिटर उत्तर नदिको बाटो हुदै झरना सम्म पुगिन्छ ।
