पर्यटयको रोजाइमा चोत्लुङ पार्क
November 22, 2019 Paryatan Yatraतेह्रथुम । सांस्कृतिक पर्यटन प्रबद्र्धन गर्ने उद्देस्यले तेह्रथुमको लालीगुराँस नगरपालिकामा निर्माण गरिएको चोत्लुङ (सिद्धी प्राप्ति) पार्क पर्यटकहरूको रोजाइमा पर्न थालेको छ । 
लिम्बू समुदायको मौलिकतासँग जोडेर ढुंगा मात्र प्रयोग गरेर बनाइको यो पार्कमा घुम्न तथा हेर्नका लागि दैनिक सयौंको संख्यामा पर्यटकहरू आउन थालेका छन् । लिम्बू भाषामा ‘चो’ को अर्थ लक्ष्य र ‘लुङ’को अर्थ ढुंगा हुन्छ । यस अर्थमा यो चोत्लुङ पार्कको विशेषता भनेको ढुंगाको सभ्यता हो । आदिमकालदेखि आफ्नै भाषा, लिपी, धर्म, संस्कार, संस्कृति, रीतिरिवाज रहेको लिम्बू जातिमा ढुंगाको छुट्टै महत्व रहेको र यसको पुरातात्विक सभ्यताको भग्नावशेष जगेर्नाको अभिप्रायले यो पार्क बनाइएको लागीगुराँस नगरपालिकाका प्रमुख तथा लिम्बू मुन्धुमविद् अर्जुन माबोहाङ बताउनु हुन्छ । यो पार्कको विभिन्न भागमा अग्ला–अग्ला ढुंगाका स्तम्भहरू गाडिएका छन् । यसरी ढुंगा गाडिने परम्परा लिम्बू समुदायमा प्राचीनकालदेखि नै छ । लिम्बूहरूले जन्मदेखि पर्यन्तसम्म विभिन्न सामाजिक संस्कारमा लुङ अर्थात् ढुंगा गाड्दछन् ।
आदिमकालमा लिम्बू जातिको युमा (पितृ) ले प्रयोग गरेको तान बुन्ने ठाउँ र धागो अड्याउने खम्बा यहाँ राखिनु पार्कको विशेषता हो । यो ढुंगाको उचाई करिब १६ फिटसम्मको छ । नजिकै ढुंगाको तराजु राखिएको छ । अर्थ मावन सम्भताको सुरुवात भएपश्चात बिहाबारी गर्दा यही तराजुमा जोखिएर मात्र तौलअनुसार निर्णय लिनुपर्ने किंवदन्ती लिम्बु समुदायमा छ । महिलाको भन्दा तौल बढी भएमात्र पुरुषले विवाह गर्न पाउने प्राचीन सभ्यता रहेको लिम्बू मुन्धुमविद्हरू बताउँछन् ।
करिब ५० रोपनी क्षेत्रफलमा निर्माण गरिएको पार्कको पूर्वपट्टिको भागमा लिम्बू जातिको आदिम राजा ‘सावा येहाङ’को सभ्यतालाई पुनः निर्माण गरिने भएको छ । आदिमकालको सभ्यतालाई प्रतिबिम्वित गराउने सावायेहाङ पाङभे (गाँउ)मा आठवटा परम्परागत घरहरू निर्माण गरिनेछ । लिम्बू जातिको अन्तर्राष्ट्रियस्तरको अनुसन्धान केन्द्र निर्माण गर्ने उद्देश्यका साथ निर्माण गरिएको पार्कमा जन्म, विवाह, मृत्युलगायत सामाजिक तथा सामुहिक कार्यहरू गरिने लालिगुराँस न.पा. ६ का वडाध्यक्ष त्रिलोचन लिम्बूले बताउनु हुन्छ ।
यो पार्क बनाउनका आ.व. ०७४÷७५ मा नगरपालिकाले १५ लाख मात्र बजेट विनियोजनपछि निर्माण सुरु गरिएको हो । पार्कको प्रवद्र्धन र विकासका लागि यस वर्ष पनि रकम छुट्याएको नगरपालिकाले जनाएको छ । लिम्बू जातिको संस्कार चलाउने फेदाङमा, येवा, साम्बालगातयका शास्त्रीय ज्ञान भएका मन्त्रधारीहरू पछिल्लो समय लोप हुदै जाँदा लिम्बू सभ्यता र संस्कार नै धरापमा परेकाले यही स्थानमा उत्पादन गरिने जनाइएको छ ।
