मोरङको जेफालेबाट देखिन्छ मनोरम हिमश्रृंखला

मोरङ । केराबारी गाउँपालिका वडा नम्बर २ मा रहेको जेफाले डाँडामा यतिबेला आन्तरिक पर्यटकको रोजाइमा पर्न थालेको छ । यहाँबाट पूर्व क्षेत्रका हिमश्रृंखलाको दृष्यवालोकन गर्न पाइने हुँदा इटहरी, धरान, विराटनगर लगायतका स्थानबाट आउने आन्तरिक पर्यटकको संख्यामा उलेख्य वृद्धि भएको छ ।

यसक्षेत्रको भौतिक पूर्वाधार गर्न प्रदेश सरकारले समेत महत्व दिएको छ । स्थानीय गाउँपालिकाले यस क्षेत्रको गुरुयोजना बनाएर विकास गर्ने जनाएको छ । पर्यटकको संख्यामा वृद्धि भएसंगै स्थानीयले जेफाले होमस्टेको स्थापना गरेका छन् । ‘पहिले पर्यटक आउँदैन थिए’ होम स्टेका सचिव भीम ठकुरीले भन्नुभयो, ‘२ वर्षदेखि पर्यटक आउन थालेका हुन्, अहिले बढिरहेका छन् ।’

समुद्री सतहदेखि १ हजार ९ सय ७० मिटरको उचाईंमा रहेको जेफाले डाँडामा ७० लाख लगातमा भ्यूटावर निर्माण गरिएको छ । यहाँबाट सूर्योदयको दृष्यसँगै प्रदेश एकका अधिकांश जिल्लाका भू–भाग प्रष्टसँग देख्न सकिन्छ भने सर्वोच्च शिखर सगरमाथा, कञ्चनजंघासँगै विभिन्न हिमशृंखलाहरू पनि देख्न सकिन्छ ।

जेफालेमा २५ घरधुरी छन् । यहाँको मौलिक परम्परा अर्को आकर्षण हो । केरावारी गाउँपालिकाका वडाअध्यक्ष प्रेम लिम्बूका अनुसार जेफालेसम्म पुग्ने कच्ची सडकको स्तरोन्नति गरे अझै धेरै पर्यटक पुग्ने सम्भावना छ ।